Forwach köm stipe foon di Sydslesvigudvalg än e Region Syddanmark tu e EUROPEADA (28. juuni to di 7. juuli 2024). Än nü koon ham e manerhäid-EM ouer nuch möör stipe foon e dånsche sid froie. Uk da fjour söödjütlönjsche gemiinde, weer da spal-stääinge lade unti wat for e loos-tiinj stöönj, due giilj. Süwälj Aabenraa, Haderslev, Sønderborg as uk Tuner deet enarken 75.000 DKK.
“We san unhiimlig fernäid än tunkboor deerfor”, säit Ruwen Möller, projektliidjer foon e EUROPEADA.
Di 10. detsämber wörn da loose täägen önje Sydbank Parken önj Haderslev. Än önje samer spaalt huum aw e dånsch sid foon e gränse önj Aabenraa, Kruså., Sønderborg än Tuner. Bütedåt as deer en sü nånte kulturdäi (3. juuli) awe Knivsbjerg.
”We san rucht fernäid, dåt we uk kultuur deerbai heewe, wat we heer - uk - önj Sööd-Jütlönj heewe. Än deer san bloots hu kääre, wat mansche sü gödj tuhuupebrenge as fötjbål – ik froie me aw arken fål, da mödj tu mååge”, säit Mads Skau, bürgermäister foon Haderslev, wat bait lüüs-tiinj deerbai wus än aweedrie säi, dåt huum ordi luk ma dåt meeting häi.
Dåt jült uk for Jan Riber Jakobsen, bürgermäister foon Aabenraa Kommune: “Önj Aabenraa san we rucht stoolt deerouer, dåt we jarling geestjeewer for e EUROPEADA san. Dåt gränselönj än dåt tuhuupeuugen ouer e gränse as wat, wat we arken däi mååge än üüs geografiische plåts as gränsegemiinde as wat, wat we as fordiilj siie än weer we ma stult da fordiilje än sünergiie brüke. Ik froi me aw en fötjbål-fäst, wat aw üs önje samer täiwet, än ik hoow, dåt maning geeste tu da stääinge önj Aabenraa Kommune kaame.”
“Önj Sønderborg san we oordi fernäid, dat we en diilj foon e EUROPEADA san, weer da manerhäide tuhuupekaame än e wjartful tuhuupelaawen wise. Di EUROPEADA as gliktidi en meeting ma maning diilnaamere än tukiiker önj üüs dånsch-tjüsch gränse-regjoon, wat e apmärksoomhäid aw e lönjsdiilj lankt än hoowentlik mör geeste brangt, wat we üüs åltumååle wansche”, säit Sønderborgs bürgermäister Erik Lauritzen.
Än Tuners bürgermäister Jørgen Popp Petersen säit: ”Mååst ninte koon da manschne sü tuhuupebrenge as sport. Heer san we åltumååle unlik än eewensch lik. Dåt as wat, wat fötjbål än sport gons generel koone. Deeram froie we üs önj Tuner ai blots aw en grut sport-meeting, ouers uk aw en grut fäst for da brökete manerhäide.”
Foto: Martin Ziemer/FUEN
.jpg)
.png){kind=logo}
-1.png){kind=logo}
_(1).png)
