Di co-treener fort tjüsche nasjionåål-tiim seet ham for e fädjbål-EM for autochtoone än nasjionååle manerhäide in än as bai e ütloosing di 10. Detsämber önj Haderslev deerbai.
It´s a match! Önje samer 2024 kamt e EUROPEADA tu e dånsch-tjüsch gränse. Mads Buttgereit kånt di fädjbål söödlik än nordlik foon e gränse sü gödj as niimens ouers. Di 38-iir üülje toorstönjer as deerma ideal as sport-fertreeser for e fädjbål-EM for autochtoone än nasjionååle manerhäide.
“Ik ban oordi fernäid, sport-fertreeser for e EUROPEADA tu weese. Dat as me en iir. As ik frååget wöör, brükt ik ai lung täiwe; ours gliks tusäid“, sü Mads Buttgereit, wat toorstönjer for IF Stjernen Flensborg än oudere feriine wus. Deer, weer hi mååstens spaalt hädj, dåt Engelsby-Centret önj Flansborj, as on foon da stääinge foon e EUROPEADA. Duch uk da oudere feriine än stääinge önj Tjüschlönj än Danmark, weer näister samer spaalt wård, kånt Buttgereit üt e jarst hönj.
Buttgereit wöör di 3. juuni 1985 önj Esbjerg önj Danmark tuläid. Deer än önj Flansborj wårt di saan foon en dånsch mam än en tjüschen taatje grut. Buttgereit spaalt jarst for e TSV Glücksburg, ourdåt hi önj Glücksburg awe dånsch schölj wus. Aweedrie wakselt hi tu IF Stjernen eefter Flansborj, weer hi önje samer 2006 abituur awt dånsch gümnaasium, e Duborg skole, måaget.
Di toorstönjer gäng eefter Danmark tubääg än wårt treener, tuun biispaal for da drenge foon Fuglebakken KFUM önj Aarhus än foon Aalborg BK. Aw e sid foon e treener-ütbiling, wat ma e UEFA-A-Lizenz iinjet, studiirt hi dånsch, matematiik, sport än historie, am schöljmäister tu wården.
Sunt 2010 uuget hi as schöljmäister önj Danmark än wård 2013 treener foon e jööged-tiim foon di dånsche jarstligaa-tiim FC Midtjylland. Dan gäng et gau. Hi wård treener foon da proofis. 2018 want Midtjylland e dånsch mäisterschap. Buttgereit as uk co-treener foon dåt U 18- än et U 20-nasjionååltiim foon Danmark, iir hi foon e nasjionåål-treener Kasper Hjulmand as moon foont feek for standard-situasjioone uk önjt treener-tiim foon e A-nasjionåal-tiim håålt wård. Eefter e UEFA EURO 2020, weer Danmark jarst önjt huulew-finaale ütschiiset, hålt di üülje bundes-treener Hansi Flick Buttgereit tu e DFB. Sunt di 1. August 2021 as Buttgereit co-treener for standards foon et tjüsch nasjionåal-tiim, wus bai e WM önj Katar än as nü deerbai, åles paroot tu mååge for e EM tuhüs önj Tjüschlönj önje samer
“Natörlik gungt et for ålem am e EM. Ourdåt e EUROPEADA tu e seelwie tid spaalt wård, koon ik schandlikerwis ai heer weese. Ik wal ours hål forwach deerfor söörjie, dåt dåt meeting bekånter wårt än wansch da, wat for e EUROPEADA stönje, än da diilnamere nü åal en belaawen, wats ai ferjeese”, sü Buttgereit, wat seelew iinjsen bai et tiim foon e dånsch manerhäid maspaalt hädj.
E dånsch manerhäid hiirt jüst sü as e tjüsch manerhäid önj Danmark än da Sinti än Roma önj Slaswig-Holstiinj än da frasche tu da hiisige, wat for dåt turniir stönje. E FUEN (Föderalistische Union Europäischer Nationalitäten), e tougeforiining foon e manerhäide, stoont for e organisasjioon.
Saandi, di 10. detsämber, wårde da tiims for e EUROPEADA önj Haderslev, önj Danmark, ütliiset. Dåt gungt önjt stadion foon SønderjyskE for ham. Deer heet Buttgereit uk åål spaalt. Hi kamt saandi uk forbai.
Photo: DFB/Philipp Reinhard
.jpg)
.png){kind=logo}
-1.png){kind=logo}
_(1).png)
