We heewe üs bemoitet, jüst sü as maning bundesdäismoons än -wüste, wat en im uur for manerhäide heewe. Dåt heet ham luunt: di hüshüüljütschus foon e Bundesdäi häi önje leest waach tusäid, e EUROPEADA 2024 ma 250.000 Euro tu stipe. Dåt as en meelstiinj, am giilj fort dåt gruut sportmeeting tuhuupetufüünj.
„E EUROPEADA as en fäst for di sport än da manerhäide, foont fair play än derfor, dåt we ål bröket san. We dan fernäid än tunkboor. E önjtschiising wiset, dåt huum önjerkånt, wat e EUROPEADA bedjüset“, säid FUEN-prääsident Loránt Vincze. "Sü fue e FUEN än da hiisige organisasjoone - dåt san da fjour autochthoone manerhäide önj e tjüsch-dånsch gränseregjoon – e finansiel sääkerhäid än di fri-rüm, wat ja brüke, am e fädjbål-EM 2024 foon da manerhäide tu organisiire.“
Uk visekanzler Robert Habeck, schirm-hiire foon e EM, wus fernäit, wat gödj ferhoondelt wöör: "Dåt heet ham luunt, dåt we üs for e EUROPEADA 2024 inseet heewe. We häin luk deerma. Nü froi ik me nuch möör aw da spaale näist iir."
E EUROPEADA as foon di 28. Juuni bit tu e 7. Juuli 2024 uner dåt moto „between the seas“ önj e tjüsch-dånsch gränsregjoon. 27 kjarlse- än nüügen wüste-tiims spaale - tu e seelwie tid tu e "grut" UEFA-fädjbål-EM önj Tjüschlönj – än dåt önj 13 stääinge önj Tjüschlönj än Danmark, tuun biispaal önj Flansburj, Sønderborg/Sonderburg, Taning/ Tønning än Eckernförde/Egernførde. E dånsch manerhäid önj Tjüschlönj, e dånsch manerhäid önj Danmark, da Sinti än Roma än da Frasche önj Slaswig-Holstiinj stönje for e EM.
Äädergrün
E FUEN stoont for di wedstrid tuhuupe ma hiisie. Bit nü wöör e fädjbål-Europa-mäisterschap foon e manerhäide önj Graubünden, Swaits (2008), önje Lausits, Tjüschlönj (2012), önj Söödtirool, Italien (2016), än önj Kärnten/Koroška, Ååstenrik (2022), ütspaalt.
Sunt 2008 jeeft et önjt seelew iir as e UEFA EURO en EUROPEADA, åle fjouer iir. Di wedstrid as en gruut sport-meeting, wat faire wedstrid ma da inträse foon autochthoone, nasjionoole manerhäide ferband. Aw e plåts än awe sid deerfoon gungt et am fairplay, respekt, tolerans än dåt maenouder foon unlike fölkj.
.png){kind=logo}
-1.png){kind=logo}
_(1).png)