E loonsregeering Slaswig-Holstiinj stipet e EUROPEADA 2024 ma 150.000 Euro – banelönjsminister Sütterlin-Waack än di manerhäide-awwårtsmoon Callsen heewe tuhuupe di beschiis ouerdänj.
„Sunt 2008 låpt e EUROPEADA arks fjour iir. Öntwasche as jü tu en grut meeting wörden, weer ma spaale än drååwene aw da manerhäide haanewiset wård. Dåt meeting as gåns fain, wat we hål stipe, än we san stult, dåt Slaswig-Holstiinj jarling tuhuupe ma Danmark önje gränseregjoon geestjeewer for da maning diilnaamere bai dåt bröket sport-meeting as“, sü Sabine Sütterlin-Waack (CDU).
Tuhuupe ma di manerhäide-awwårtsmoon foon e ministerprääsident, Johannes Callsen, heet Sabine Sütterlin-Waack, wat as banelönjsminister for sport tuständi as, di beschiis önje roomen foon e ruchtliniie foon sport-meetinge önj Slaswig-Holstiinj ma 150.000 Euro ouerdänj.
„Ik froie me, dåt da manerhäide in üüs regjoon ma sü maning sportlike än kulturele meetinge e EUROPEADA tu en groosårtig begääbenhäid mååge. Da tiims foon e dånsch manerhäide, e frasch fölkjsfloose än e tjüsche manerhäide önj Nord-Slaswig wansch ik luk önjt spaal, än arken diilnamer en gou tid bait spaale än oufsits", seed di manerhäide-awwårtsmoon Johannes Callsen.
E Fööderalistisch Uunion Europääische Nasjooone (FUEN) stoont for e EUROPEADA. For e 5. ütgoowe stönje e dånsch manerhäid önj Tjüschlönj, e fölkjsfloose foon da Frasche, e loonsferbånd Sinti än Roma önj Slaswig-Holstiinj än e tjüsch manerhäid önj Danmark. Dåt turnniir as foon di 28. juuni bit 7. juuli - än da stääinge önj Slaswig-Holstiinj san: Flansborj, Harrislee, Slaswig, Eckernförde, Taning, Bräist, Naibel än Risem-Lunham.
Banelönjsminister Sabine Sütterlin-Waack (CDU) ouerdäät tuhuupe ma di manerhäide-awwårtsmoon foon e ministerprääsident, Johannes Callsen, di beschiis tu EUROPEADA-projäktliidjer Ruwen Möller (l.). Bil: Jonas Makoschey
.png){kind=logo}
-1.png){kind=logo}
_(1).png)
