Huum schal ai trung weese for Spånjen unti Braasiljien, ouers Söödtiirool unti da Kärntner Slooweene. Nü stoont fåst, wat for tiims önj da floose-runde foon e EUROPEADA 2024 for ja trung weese schan – diling wörn nemlik önjt staadion „Sydbank Park“ önj Haderslev/Hadersleben da floose ütliiset for e fädjbal-europamäisterschap foon da manerhäide, wat 2024 tut 5. toch as. Ambai 130 geeste wjarn deerbai, deeruner 20 floose foon da tiims üt hiilj Europa än manschne üt politiik, sport än meedie.
36 tiims foon nasjionååle manerhäide än fölkjsfloose üt 15 lönje Europas san deerbai, deerfoon 27 kjarlse än 9 wüset-tiims. Da kjarlse spaale önj e floose-runde foon di 30. Juuni bit tu di 2. Juuli önj soowen floose, da wüste önj tri floose. E näist runde än da iinjspaale san foon e 4. bit tu di 6. Juuli.
Da floose:
Di ploon foon da spaale ma klookesliik stönje amenlait aw e ofisiel inesit www.europeada.eu.
Önje di noome foon e FUEN (fööderalistisch unjoon europäische nasjioone), tougeforiining foon da autochtoone mänerhäide Europas, wat for e mäisterschap stoont, loowet di tweete formoon Gösta Toft: „Jüst sü as 2008 önj Gaubünden, 2012 önje Lausits, 2016 önj Söödtiirool än 2022 önj Kärnten wårde we ai bloots spånende spaale än starke gefäile heewe. Dåt wård en fäst, weer et bili bröket tugungt!“ Deerbai sloit hi e bro twasche da wjarde bait fädjbål än dåt huum ham for e manerhäideruchte inseet, weerfor e FUEN stoont. „Heer önjt staadion jüülje da wjarde, wat for di fädjbal, ouers uk for da manerhäide jüledeemödj wise, ferönjtuurdiing ouernaame, tuhuupehüülj wååre än hart uuge“, sü Toft. Brüke we di tuhuupehüülj aw än bütefor dåt spaalfälj bai e EUROPEADA 2024, am üüs geminsoome müülje tu länge!“
Da kuugle wörden foon kånte manschne täägen: Mads Skau, bürgermäister foon Haderslev/Hadersleben, än Stefan Seidler, SSW-bundesdäimoon, huum bai e ütliising foon da wüste-spaale bai da lüüs-pute stönje. Huum bai da kjarlse iinjenouder spaalt, läi önj da hönje foon Povl Davidsen, wat tuhuupe ma oudere dåt tiim SønderjyskE Fodbold hiirt, än Mads Buttgereit, co-treener foon e tjüsch nasjionåål-tiim än jüst nånte sport-fertreeser foon e EUROPEADA.
Geestjeewer foon e EUROPEADA 2024 san da Sinti än Roma, e frasch manerhäid önj Slaswig-Holstiinj, e tjüsch manerhäid önj Danmark än e dånsch manerhäid önj Tjüschlönj. Dåt moto „Between the Seas“ wiset, weer spaalt wård: önj 14 stääinge önj Tjüschlönj än Danmark, twasche Nord- än Ååstsiie.
Aw e sid foon e fiir tu began än da iinjspaale, as wälj en ouder highlight di kultuurdäi önje mad foon e mäisterschap., weer da manerhäide jarnge lultuur, spräke än tradisjioone wise. Deer ap tu jeewt et konseerte, diskussioone än maning meetinge mör.
Photocredit: FUEN/Martin Ziemer
.jpg)
.png){kind=logo}
-1.png){kind=logo}
_(1).png)
