Jü fötjbål-mäisterschap foon da autochtoone, natsjonaale manerhäide önj Europa fäit stipe üt e grut politiik: Robert Habeck (Bündnis 90/Die Grünen), bundesminister for ökonomii än kliimaschööl än gliktidi fiitsekånsler, wårt e schirmherrschaft for e EUROPEADA 2024 önjt tjüsch-dånsch gränslönj ouernaame.
„Dåt tjüsch-dånsch gränslönj as en modälregjoon, wan et deeram gungt, hü et tuhuupelaawen önj ünlike kultuure aw tou side foon en gränse fründschaplik funktsjoniire än widereönjtwikeld wårde koon. Deeram ban ik fernäid, dåt ik di båntje as schirmherr bai jü näist fötjbål-mäisterschap foon da europäische manerhäide ‚Europeada’ 2024 ouernaame mätj, wat önj üüs läämti gränsregjoon for ham gunge wårt. En grut sportlik begääwenhäid, wat for tuhuupehüülj stoont än di europäische gaist aw e beeste wise waderspäigelt“, säit Habeck.
Önj Lübeck tuläid, laawet Habeck diling önj Flansborj, weer 2002 uk sin poliitisch kariääre begand. Foon 2009 bit 2018 sätj hi önj e slaswik-holstiinjsche loondäi än wus tuleest as minister tuständi for energii-wiinjing, loonwirtschap, amwråål, natör än digitalisiiring. Dan wörd hi partei-formoon for da gräine önj Berlin än köm bai e wool 2021 in önj e bundesdäi, weer hi nü minister for ökonomii än kliima as.
„Dåt ma Robert Habeck ån foon da bekåndste poliitikere önj Tjüschlönj e schirmherrschaft for e EUROPEADA 24 ouernamt, as en luksfål for üs“, säit FUEN-fiitsepresident Gösta Toft. „Hi kånt et gränslönj än da manerhäide än hi seet ham for en hiimstoun in, weer arken ham tuhüs fäilt. Dåt heelpt üs bai üüs intreesen for en kulturäl brökethäid.“ Dan as hi je uk bekånd deerfor, dåt’r energiiresärwe mobilisiire koon – dåt köö bai e EUROPEADA nooch heelpe.
Jü 5. EUROPEADA wårt foon e 28. juuni bit tu e 7. juuli 2024 unert moto „Between the seas“ döörfjard – tu e seelew tid as e UEFA-EM önj Tjüschlönj (14. juuni bis 14. juuli). Dåt turniir wårt ütrichted foon da fjouer manerhäide önjt tjüsch-dånsch gränslönj: jü frasch manerhäid, da sinti än roma, jü tjüsch manerhäid önj Nordslaswik än jü dånsch manerhäid önj Söödslaswik. Da söödslaswikere önj Flansborj ouernaame di grutste pårt foon e organisatsjoon än hääwe deertu en EUROPEADA gGMBH grünläid.
Äädergrün:
Jü FUEN stoont fort döörfäären foon et turniir än organisiirt e EUROPEADA gemiinsoom ma regjonaale feriininge. Awfoorie heet et ål fötjbålmäisterschape for manerhäide jääwen önj Graubünden/Schwaits (2008), önj e Lausitz/Tjüschlönj (2012), önj Südtirol/Itaalien (2016) än önj Kärnten/Ååstenrik (2022). Dåt turniir as en grut sportlik begääwenhäid, wat en weedstrid än en sportfäst ferbant ma åål dåt, weer da autochtoone än natsjonaale manerhäide jam for inseete.
.jpg)
.png){kind=logo}
-1.png){kind=logo}
_(1).png)
